മമ്മൂട്ടി - ഷാഫി വീണ്ടും: ചട്ടമ്പിനാട്

തൊമ്മനും മക്കളും, മായാവി എന്നീ ചിത്രങ്ങള്‍ക്കു ശേഷം മമ്മൂട്ടിയും ഷാഫിയും വീണ്ടും ഒന്നിക്കുന്നു. 'ചട്ടമ്പിനാട്' എന്നു പേരിട്ടിരിക്കുന്ന ചിത്രത്തില്‍ വീരേന്ദ്ര മല്ലയ്യ എന്ന ചട്ടമ്പിയെയാണ് മമ്മൂട്ടി അവതരിപ്പിക്കുന്നത്. ബെന്നി പി നായരമ്പലമാണ് ചട്ടമ്പിനാടിന്‍റെ രചന.

ചട്ടമ്പിനാട് എന്ന് പേരിട്ടത് ചട്ടമ്പികളുടെ നാട് എന്ന അര്‍ത്ഥത്തില്‍ തന്നെയാണ്. ചെമ്പട്ടുനാട് എന്ന ഒരു ഗ്രാമത്തില്‍ചട്ടമ്പികളുടെ എണ്ണം പെരുകി വന്നപ്പോള്‍ ‘ചട്ടമ്പിനാട്’ എന്നു പേരു മാറേണ്ടി വരുന്നു. ആ നാട്ടിലേക്ക് ചട്ടമ്പികളുടെ ചട്ടമ്പിയായ വീരേന്ദ്ര മല്ലയ്യ എത്തുന്നതോടെ കഥ വഴിത്തിരിവിലെത്തുകയാണ്.

കോമഡിയും ആക്ഷനും നിറഞ്ഞ ഈ സിനിമയില്‍ മുകേഷ് സുപ്രധാനമായ ഒരു കഥാപാത്രത്തെ അവതരിപ്പിക്കുന്നുണ്ട്. കന്നഡച്ചുവയുള്ള മലയാളത്തിലായിരിക്കും മമ്മൂട്ടിയുടെ കഥാപാത്രം ചട്ടമ്പിനാട്ടില്‍ സംസാരിക്കുക. മൂന്നു നായികമാരാണ് ചിത്രത്തില്‍ അഭിനയിക്കുന്നത്.

മനോജ് പിള്ള ക്യാമറ ചലിപ്പിക്കുന്ന ചട്ടമ്പിനാടിന്‍റെ ഗാനങ്ങളൊരുക്കുന്നത് അലക്സ് പോള്‍ - വയലാര്‍ ശരത്ചന്ദ്രവര്‍മ ടീമാണ്. മമ്മൂട്ടിയുടെ നേതൃത്വത്തിലുള്ള പ്ലേ ഹൌസാണ് ചിത്രത്തിന്‍റെ നിര്‍മ്മാണം. പൊള്ളാച്ചിയും പഴനിയുമാണ് പ്രധാന ലൊക്കേഷനുകള്‍. സെപ്റ്റംബറില്‍ ചിത്രീകരണം ആരംഭിക്കുന്ന ചട്ടമ്പിനാട് ക്രിസ്തുമസിന് പ്രദര്‍ശനത്തിനെത്തും.